واحشني يا يزن.. أتمنى تكون تمام
يجمعنا ف يوم مكان و نعرف بعض أكتر كمان
كنت مقصر ف حقك مكونتش بسأل ولا أنت حتى
بس الكلام ده كله إتغير لسه ف الدم برضو إخوة
بشوف يومياً ضحايا منكم.. ربنا يعينكم
عارف إنك زعلان بس الإيد مربوطة زي إيدكم
في أوبشن مسافة السكة.. بس إنتو اللي معندكوش رز
بهزر معاك الواحد محاط من كل إتجاه بالحزن
ربنا ينصركم ف الحرب إنت لا تبع معارضة ولا حزب
إنت الشعب اللي بيسقي الأرض دم بسبب كلب إبن كلب
الجيش ألحد تقريباً إعلام غرضه تغييبك
و الحال من بعضه برضو ده إبتلاء من ربنا لينا
فحسبنا الله مين حس بينا غيرنا
عندك قلبو الثورة فتنة بين إتنين شيعة و سنة
مليشيات إيرانية و مرتزقة جنسيات مختلفة
و قصف روسي يدك ف كل مدرسة و مستشفى
و الحاكم الأهبل.. فاكر نفسه لسه حاكم
سيطرة إيران على كفريا و الفوعة و غيرهم أماكن
الروس عالساحل كل ده هيكون له توابع
كل الجنسيات اللي بتحاربلك مش لأجلك ده ليهم دافع
فتقدملهم بدائل عشان يسيبوا أرضك يا فاشل
أبصلك أشوف أبوك كان برضو حافظ مش فاهم
2nd Letter
موصلش رد ليك على أخر جواب بعتهولك
حاولت أتصل بيك لكن كل أرقامك مقفولة
عقولنا مصدومة من الصمت اللي مخيم ع الأمة
صحيح مش معقولة يعارضوا الغرب طب مين يديهم اللقمة
ببص على صور الجثث بحرقة.. و ساكت
إقروا على ضماير العرب الفاتحة.. ماتت
إخواتنا بيلجأو لمراكب و إنت سايبهم عادي قاعد
لو ف حكامنا راجل واحد كات فلسطين الأولى فاهم؟
فمتستناش مساعدة أنا أسف لو كنت بفاجئك
الناس ف بلدي نايمة و البلاد التانية و برضو ف بلدك
مملكش غير إني إدعيلك و بقلمي أكتب لأهلي
و ف قلبي أكتم ف وجعي و عارف برضو مش هيغيثك
تشبهولنا كتير خالد سعيد حمزة الخطيب
كل إسم من دول فتيل أشعل ثورة للتغيير
فعمل خلل ف فكر كل زفت م اللي ماسكنا
و صورلهم جشعهم إن الحل إبادة كاملة
المعاناة مش واحدة بس إحنا يعني مش ف الجنة
لكن أتمنى تنورنا ف بلدك التانية أم الدنيا
هنا ف بلدنا أأمن لحد ما يبقى الوضع أفضل
و هييجي اليوم اللي تنطق سوريا و تقول كل اللي راح يرجع
فمتزعلش.. أكيد هتقوم من تاني بلدك
و كل شهيد سقط حي عند ربه يرزق
0 التعليقات:
إرسال تعليق